Մինչև 20 տարեկան ըմբիշների Եվրոպայի առաջնությունում ազատ ոճի ըմբիշ Մուշեղ Մկրտչյանը 79 կգ քաշային կարգի եզրափակիչում 9։4 հաշվով հաղթեց վրացի Օթար Ադիշվիլիին ու դարձավ ոսկե մեդալակիր։
Ըմբշամարտի ֆեդերացիայից հայտնում են, որ Մուշեղ Մկրտչյանը շատ լավ սկսեց Եվրոպայի առաջնության եզրափակիչ գոտեմարտն ու անմիջապես չորս միավոր վաստակելով, առաջ անցավ հաշվի մեջ։ Երկրորդ մրցափուլում վրացի ըմբիշն ամեն ինչ արեց կորցրածը հետ բերելու համար։
Գոտեմարտի ավարտից 40 վայրկյան առաջ Ադիշվիլին նետվեց գրոհի ու գորգի մրցավարը ի վերջո հաղթանակը 6։5 հաշվով շնորհեց նրան։ Բայց մեր մարզիչներն անմիջապես դիմեցին չելենջի օգնությանը և արդարությունը վերականգնվեց, ու հաղթանակը շնորհվեց հայ ըմբիշին՝ 9։4 հաշվով։
Ազատ ոճայինների մրցումային առաջին օրը Մկրտչյանը, որը հանդես է գալիս 79կգ քաշային կարգում, 10։0 հաշվով հաղթանակի էր հասել ռումինացի Գիգի Սուբտրիցայի և իտալացի Ռաֆաելե Մարտուլոյի նկատմամբ։
Կիսաեզրափակիչում մեր ըմբիշը մրցեց ադրբեջանցի Սաբուհի Ամիրասլանիովի հետ։ Մուշեղը դժվարին գոտեմարտում հաղթեց 3։1 հաշվով, ու այդ հաղթանակը այնքան էր ազդել ադրբեջանցի մարզչի վրա, որ նա դուրս էր եկել գորգ` Մկրտչյանի հետ հարաբերություններ պարզելու։
Բայց ամեն ինչ արագ հարթվեց ու Ամիրասլանովը գորգը լքեց գլխիկոր։ Ոսկե մեդալի համար վճռորոշ գոտեմարտում մեր ըմբիշի մրցակիցը վրացի Օթար Ադիշվիլին էր։
Նշենք, որ այսօր Եվրոպայի առաջնությունում Հայաստանի հավաքականի կազմում ոսկե մեդալակիր է դարձել Հայկ Պապիկյանը (70կգ), իսկ Հարություն Հովհաննիսյանը (57կգ) դարձել է արծաթե մեդալակիր։
Մրցումների վերջին օրը՝ հուլիսի 3-ին, գերծանր քաշային կարգում Եվրոպայի չեմպիոնի կոչման համար եզրափակիչում գոտեմարտելու է Լյովա Գևորգյանը։
61կգ քաշային Հայկ Աբրահամյանը իրավունք է ստացել սփոփիչ գոտեմարտի միջոցով պայքարելու բրոնզե մեդալի համար։ Նույն հնարավորությունն ունի նաև 92 կգ քաշային Սերգեյ Սարգսյանը։
Առաջնությունն անցկացվում է Իտալիայի մայրաքաղաք Հռոմում։
