Սիրելի՛ կանայք և աղջիկներ,
Թեպետ այսօր հնարավորություն չունեմ ձեզ տեսաուղերձով դիմելու առողջական վիճակիցս ելնելով, բայց սրտանց շնորհավորում եմ ձեզ և հղում իմ ամենաջերմ բարեմաղթանքները՝ գարնան ամենագեղեցիկ տոնի՝ Մարտի 8-ի կապակցությամբ։
Մեր պատմությունը բազմիցս ապացուցել է, թե որքան ուժեղ, համառ և արժանապատիվ է հայ կինը։ Դուք եղել և մնում եք մեր ժողովրդի վերածննդի, կյանքի շարունակության և հույսի ամենամեծ խորհրդանիշը։
Կանանց միջազգային օրվա առիթով մաղթում եմ ձեզ անսահման սեր, երջանկություն, ամուր առողջություն, մշտական ժպիտներ և ձեր բոլոր երազանքների ու նպատակների իրականացում։ Թող ձեր յուրաքանչյուր օրը լինի տոն՝ լեցուն լույսով, խինդով և բարությամբ։
Այս օրը առանձնահատուկ հարգանքով գլուխ եմ խոնարհում մեր հերոսածին մայրերի, մեր քույրերի ու կանանց առջև՝ հատկապես այն կանանց հիշատակի առջև, ովքեր ծառայել են հայրենիքին որպես զինծառայող կամ կամավոր և անմահացել են Արցախյան գոյամարտերում ու պատերազմներում։
Խոնարհում եմ նաև այն մայրերի, քույրերի և կանանց առջև, որոնց որդիները, ամուսիններն ու եղբայրները զոհվել են հանուն հայրենիքի կամ այսօր էլ կանգնած են սահմանին՝ շարունակելով իրենց անձնվեր ծառայությունը։
Հատուկ շնորհավորանքներս եմ հղում նաև այն ուժեղ ու խիզախ կանանց, ովքեր հենց իրենք են կանգնել կամ այսօր էլ կանգնած են հայրենիքի պաշտպանության առաջնագծում։
Պատահական չէ, որ մեր ազգային արժեհամակարգում կնոջ հանդեպ հարգանքը ունի խոր արմատներ։ Հայ կինը ընտանիքի ջերմությունն է, օջախի ամրությունը, հավատն ու ոգեշնչումը։ Նա է կյանքի շարունակությունը, ազգի ապագայի հիմքը։
Այս ծանր ու փորձություններով լի ժամանակներում ուզում եմ առանձնահատուկ շնորհակալություն հայտնել բոլոր մայրերին ու կանանց՝ այն ուժեղ հայ կանանց, ովքեր շարունակում են կյանք պարգևել՝ նույնիսկ ցավերի և վերքերի միջով անցնելով։ Ձեր ուժն ու նվիրումն են, որ ամրացնում են մեր ընտանիքները և պահում մեր պետության ապագան։
Մեր ժողովրդի բազմադարյան պատմությունը լի է հայ կնոջ դրսևորած հերոսությամբ, տոկունությամբ և անսահման նվիրումով։ Այդ օրինակները եղել և մնում են ուսանելի ապագա սերունդների համար։ Այսօր ևս ողջունելի է ձեր ակտիվ մասնակցությունը պետական կառավարման, հասարակական և քաղաքական կյանքի տարբեր ոլորտներում։
Սիրելի՛ մայրեր, քույրեր և դուստրեր,
մեկ անգամ ևս մաղթում եմ ձեզ և ձեր ընտանիքներին առողջություն, երջանկություն, խաղաղություն, անսահման սեր և բարձր տոնական տրամադրություն։
Դուք իրականացնում եք ազգապահպան մեծ առաքելություն՝ հավատով, սիրով և անսպառ նվիրումով՝ բոլոր ժամանակներում և բոլոր իրավիճակներում։
Դուք պարզապես ընտանիքի սիրտը չեք․ դուք մեր ազգի ուժն եք, մեր ապագայի հավատը և մեր հայրենիքի լուռ, բայց ամենաուժեղ պաշտպանները։
Երբ դժվար ժամանակներ են գալիս, հենց ձեր հավատն ու տոկունությունն են, որ կանգուն են պահում ընտանիքը, զինվորին և ամբողջ ազգը։
Թող Աստված պահապան լինի յուրաքանչյուր հայ կնոջ, և ձեր օջախներում միշտ իշխեն սերը, խաղաղությունը և լույսը։
Հարգանքով՝ Հանուն Ժողովրդավար Պետականության կուսակցություն
Նախագահ՝ Arsen Sargsyan
