Վորոնեժի կենտրոնում ПАЗ մակնիշի ուղևորատար ավտոբուսում պայթյուն է որոտացել: Պայթյունի պահին ավտոբուսում եղել է 35 ուղևոր: Տուժել է 18 մարդ, որոնցից մի կին մահացել է վերակենդանացման բաժանմունքում։ Տուժածները հոսպիտալացվել են, նրանցից 3-ի վիճակը ծանր է, հայտնում է RIA Novosti-ն՝ հղում անելով իշխանություններին։
Սկզբում վարկած էր առաջ քաշվել գազի բալոնի պայթյունի մասին, սակայն փոխադրողի և իշխանությունների ներկայացուցիչները հայտարարել են, որ ավտոբուսն աշխատում էր դիզելային վառելիքով: Դիտարկվում են տարբեր վարկածներ։ Անվտանգության պահանջների անտեսմամբ ծառայությունների մատուցման հոդվածով հարուցվել է քրեական գործ։ Այսօրվանից վարորդները կխնդրեն ուղևորներին ուշադրություն դարձնել փոխադրամիջոցում կասկածելի անձանց ներկայությանը և հայտնել այդ մասին։
