armtimes.com-ը գրում է. Մարտի 1-ի գործով ամբաստանյալ Ռոբերտ Քոչարյանի պաշտպան, փաստաբան Արամ Օրբելյանը դատական հայց է ներկայացրել ՀՀ վարչապետ Նիկոլ Փաշինյանի դեմ. պահանջում է զրպարտություն հանդիսացող տեղեկատվության հերքում եւ բարոյական վնասի դրամական փոխհատուցում:
Օրբելյանը, մասնավորապես, զրպարտություն է համարել մարտի 10-ին Քաջարանում «Այո»-ի քարոզարշավի ժամանակ Նիկոլ Փաշինյանի այն արտահայտությունը, որ ինքը «էն ժամանակներում երբ մարտի մեկի հետ կապված գործ էր քննվում ՍԴ-ում, բազմիցս ելումուտ է արել Սահմանադրական դատարան», որը չի արձանագրվել սահմանված կարգով»։ Փաշինյանը նշել է, որ «ոստիկանները բացատրություն են տվել, որ ՍԴ նախագահի օգնականը կամ աշխատակազմի ղեկավարն ասել է՝ շեֆի սանիկն է, թող գա, մի գրանցեք»:
Ըստ «Կոնցեռն Դիալոգ» փաստաբանական ընկերության, որի ավագ գործընկերն է Օրբելյանը՝ ելույթի այդ հատվածը կոչված է հիմնավորելու այնտեղ նշված ոչ պատշաճ վարքագիծը, և որպես հետևանք՝ հիմնավորելու քարոզարշավի ժամանակ «Այո»-ի մոտեցումը:
Հիշեցնենք, որ դեռևս 2020 թվականի հունվարի 30-ին հանրային հեռուստատեսության «Լուրերի գլխավոր թողարկման» ընթացքում նմանատիպ (բայց ոչ նույնական) պնդումներով հաղորդում էր հեռարձակվել, ինչի առնչությամբ փետրվարի 29-ին Արամ Օրբելյանը զրպարտություն համարվող տեղեկատվությունը հերքելու և վնասի հատուցման պահանջով դիմել է դատարան։ Մինչ դա փաստաբանը գրավոր դիմել էր նաեւ Ազգային անվտանգության ծառայությանը և Հանրային հեռուստատեսության տնօրինությանը՝ խնդրելով իրեն տրամադրել հաղորդման համար հիմք հանդիսացած տեղեկությունները, դատավարական փաստաթղթերի պատճենները։ Ըստ փաստաբանական ընկերության տնօրեն Սեդրակ Ասատրյանի՝ Հանրային հեռուստատեսությունից դիմումին չէին արձագանքել, իսկ ԱԱԾ-ից նշել էին, որ Օրբելյանի գործողություններին իրավաբանական գնահատական չի տրվել, եւ քրեական գործը հարուցումը մերժվել էր ոստիկանների արարքներում հանցակազմի բացակայության հիմքով:
Սեդրակ Ասատրյանն ընդգծում է, որ վարչապետ Նիկոլ Փաշինյանը, չսպասելով համապատասխան գործով դատարանի որոշմանը, կամ առանց հավելյալ ստուգում իրականացնելու, կրկին վերարտադրել է Օրբելյանի վերաբերյալ իրականությանը չհամապատասխանող տեղեկատվություն, ինչով կրկին զրպարտել է Արամ Օրբելյանին. «Չստուգված, իրականությանը չհամապատասխանող փաստացի տվյալներ՝ զրպարտչական տեղեկություններ տարածելը արատավորում է ոչ միայն միջազգային ճանաչում ունեցող իրավաբանական գիտությունների թեկնածու, փաստաբան Արամ Օրբելյանի պատիվը, արժանապատվությունը և բարի համբավը, այլև վնասում է «Կոնցեռն Դիալոգ»՝ միջազգային ասպարեզում ճանաչում ունեցող փաստաբանական ընկերության գործարար համբավին»: Հիշեցնելով Սահմանադրությամբ ամրագրված անփոփոխելի 3-րդ հոդվածը, ըստ որի՝
Հայաստանի Հանրապետությունում մարդը բարձրագույն արժեք է, մարդու անօտարելի արժանապատվությունն իր իրավունքների և ազատությունների անքակտելի հիմքն է, եւ որ մարդու և քաղաքացու հիմնական իրավունքների և ազատությունների հարգումն ու պաշտպանությունը հանրային իշխանության պարտականություններն են, փաստաբանական ընկերությունը հորդորում է բոլորին, իսկ հանրային իշխանությունից՝ պահանջում ձեռնպահ մնալ որևէ անձի պատվի և արժանապատվության նկատմամբ ոտնձգություններից, չտարածել չստուգված, ոչ հավաստի և արժանապատվությունը արատավորող տեղեկություններ:
Նշենք, որ datalex.am դատական տեղեկատվական համակարգում դեռեւս տեղեկություն չկա հայցի մակագրվելու եւ վարույթ ընդունելու մասին: