«Եթե եղանակն այս տեմպերով փոխվի, մյուս տարվա վերջին երեւի կսկսենք …». վարչապետ Փաշինյան

ՀՀ կառավարությունն այսօրվա նիստում որոշում կայացրեց ներդրումային ծրագրի շրջանակներում հարկային արտոնություն տրամադրել «ՆԻԿՈԼԱ ԻՆԹԵՐՆԵՅՇՆԼ, ԱՐՄԵՆԻԱ» սահմանափակ պատասխանատվությամբ ընկերությանը:

Մասնավորապես, կառավարությունը գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, հումքը, նյութերը ազատեց ներմուծման մաքսատուրքից:

Հարցը ներկայացրեց Էկոնոմիկայի փոխնախարար Ավագ Ավանեսյանը, ով նշեց, որ այս ընկերությունն արդեն օգտվում էր նման արտոնությունից, այժմ փոփոխություն է կատարվում նախկինում ընդունված որոշման մեջ:

Նախագծով առաջարկվում է ապրանքների արժեքն ավելացնել 1.6 մլրդ դրամով, որի արդյունքում ներդրումային ծավալը կազմելու է 3.3 մլրդ դրամ:

Ընկերությունն առաջին արտոնությունը ստացել է 2019 թվականին: Այն զբաղվում է ձիթապտղի վերամշակմամբ եւ արտադրությամբ Կոտայքի մարզում:

«ՆԻԿՈԼԱ ԻՆԹԵՐՆԵՅՇՆԼ, ԱՐՄԵՆԻԱ» ՍՊ ընկերությունը գործում է 2002 թվականից։ Ընկերությունն առաջին փուլով ներմուծել է հումք՝ ձիթապտղի վերամշակման եւ արտադրության համար, որոնց համար նախատեսված գումարը կազմել է շուրջ 1.7 մլրդ ՀՀ դրամ: Ներկայումս անհրաժեշտություն է առաջացել երկրորդ փուլով ներմուծել մոտ 1.6 մլրդ դրամի ապրանքների լրացուցիչ խմբաքանակ:

Համաձայն ընկերության կողմից տրամադրված տեղեկատվության՝ ներդրումային ծրագրի շրջանակում ընկերությունում ստեղծվել է 15 նոր աշխատատեղ եւ իրականացվել 25 մլն ՀՀ դրամի կապիտալ ներդրում:

Փոխնախարարը նշեց, որ մաքսատուրքի արտոնությունը կազմելու է 431.5 մլն դրամ, որից բյուջե մուտք չի լինելու 5,2 մլն դրամ: Նրա խոսքով՝ ընկերության արտադրանքի արտահանման հիմնական շուկան լինելու են ԵՏՄ երկրները, սակայն նա փորձելու է նաեւ արտահանել երրորդ երկրներ:

ՀՀ վարչապետ Նիկոլ Փաշինյանն ասաց, որ Հայաստանում ձիթապտուղ աճեցնելու փորձեր արդեն կան, բայց դեռեւս չի կարծում, որ արդյունաբերական ծավալների կարող ենք աճեցնել:

Մանրամասները՝ Տեսանյութում

Հավանեցի՞ք նյութը, կիսվեք մտերիմների հետ.