Արմավիր քաղաքի հիվանդանոց է տեղափոխվել «Մանուշակ» մանկապարտեզում այսօր 3-ամյա երեխային պատանդառած տղամարդն ու 3-ամյա երեխան: NEWS.am-ի տեղեկություններով, տղամարդն ինքն իրեն վնասել է դանակով, նրան պետք է վիրահատեն: Մեզ հաջողվել է նաեւ զրուցել երեխայի հոր հետ, որն ասել է, որ երեխան վնասվածքներ չունի, նրան այս պահին հետազոտում են:
NEWS.am-ին նաեւ որոշ տեղեկություններ են հայտնի դարձել. ըստ այդմ, բանակցություններին մասնակցել է պատանդառուի նախկին կինը, Արմավիրի ոստիկանապետը, ՀՀ փոխոստիկանապետ Հունան Պողոսյանը: Այդ ամբողջ ընթացքում պատանդառուն երեխայի վրա է պահել դանակը:
Պատանդառուն իր նախկին կնոջը վնասվածք է հասցրել մանկապարտեզի բակում, վերջինիս հաջողվել է փախուստի դիմել եւ հենց այդ պահին էլ տղամարդը պատանդառել է 3-ամյա երեխային: Որից հետո կինը տեղափոխվել է ոստիկանության բաժին:
Ավելի ուշ հիվանդանոց են տեղափոխել նաեւ նրան, որն ունի վնասվածքներ պարանոցի շրջանում եւ ձեռքին: Ըստ հիվանդանոցի բժիշկների, նա քիչ անց կտեղափոխվի Երեւան:
Նշենք, որ այսօր՝ հոկտեմբերի 30-ին, ժամը 16.25-ին ոստիկանության Արմավիրի բաժին ահազանգ է ստացվել, որ մի տղամարդ դանակով զինված ներխուժել է Արմավիր քաղաքի «Մանուշակ» մանկապարտեզ: Տղամարդը դանակի սպառնալիքով մանկապարտեզում էր պահում 3-ամյա երեխայի:
Նրա հետ բանակցություններ են վարել իրավապահ մարմինների ներկայացուցիչները, այդ թվում ՀՀ փոխոստիկանապետ Հունան Պողոսյանը:
Բանակցությունների ընթացքում ոստիկանության ծառայողներին հաջողվել է երեխային անվնաս հանել սենյակից, նրան դիմավորել են ծափահարություններով:
Րոպեներ անց ոստիկանները մգեցված ապակիներով մեքենայով շենքից դուրս են բերել պատանդառուին, այնպես, որ ոչ ոք հնարավորություն չունենա տեսնելու նրա դեմքը:
Լուրեր կան, որ տղամարդը նախկին կնոջն ու երեխային տեսնելու պահանջով էր դանակով մտել մանկապարտեզի շենք՝ փորձելով այս կերպ վրեժխնդիր լինել նախկին զոքանչից, որովհետեւ թույլ չէին տալիս տեսակցել երեխային:
Ոստիկանությունն այս տեղեկությունները չի հաստատում, նրանք ասում են միայն, որ տղամարդը անձնական պատճառներ է ունեցել, սակայն չեն մանրամասնում:
Թեեւ ոստիկանությունը գաղտնի է պահում տղամարդու ինքնությունը, սակայն նախնական տվյալներով, նա Արմավիր քաղաքի բնակիչ Արգամ Հովիկյանն է:
Հավանեցի՞ք նյութը, կիսվեք մտերիմների հետ.
Նյութի աղբյուր՝ news.am
