hraparak.am-ը գրում է․ «Օրերս Ծաղկաձորում կրիմինալ դեպք է գրանցվել, որին լրատվամիջոցները չեն անդրադարձել, քանի որ ոստիկանության կայքում այն տեղ չի գտել: Սեպտեմբերի 25-ին Ծաղկաձորի բնակիչներից մեկի առանձնատան բակի տեսախցիկը ֆիքսել է, թե ինչպես է դիմակավորված անձը ատրճանակի կրակոցներով փորձում վերջ տալ տղամարդու կյանքին: Տեսանյութը, որ հայտնվել է մեր ձեռքի տակ, կա նաև իրավապահների ձեռքին: Պարզեցինք, որ տուժողի կյանքը հաջողվել է փրկել: Ավելին՝ մեզ հաջողվեց պարզել տուժողի ինքնությունը: Նա Ծաղկաձորի բնակիչ Վարդան Առաքելյանն է, որի տան տեսախցիկն էլ հենց ֆիքսել է իր դեմ իրականացվող մահափորձը: «Վարդանը Ծաղկաձորում հարգված, հեղինակություն վայելող տղա է: Ինքը թացը չորից ջոկող է, բայց թե ո՞վ, կամ ինչի՞ համար կարող էր էս քայլին գնալ, բոլորիս համար էլ անհասկանալի է»,-մեզ հետ զրույցում ասաց նրան ճանաչողներից մեկը:
Ուշագրավ է, որ հենց այս դեպքից հետո մեր տեղեկություններով աշխատանքից ազատման դիմում է ներկայացրել Ծաղկաձորի ոստիկանության բաժանմունքի պետ Դավիթ Յազինչյանը: Նա այդ պաշտոնին ընդամենն ամիսներ առաջ էր նշանակվել: Օրեր անց էլ աշխատանքից ազատվել էր ոստիկանության Հրազդանի բաժնի պետ Վաղինակ Ավետիսյանը: Սակայն եթե վերջինիս ազատումը պատճառաբանվեց երկարամյա ծառայությունից հետո թոշակի անցնելու որոշումով, ապա Դավիթ Յազինչյանի դեպքում այլ է. նա չափազանց երիտասարդ է թոշակի անցնելու համար:Ինչևէ, Ծաղկաձորում եւ Հրազդանում լուրեր են պտտվում, թե երկու ոստիկանապետերի հրաժարականների հիմքում հենց այս մահափորձի դեպքն է: Երկուսից էլ, որպես անցանկալի կադր, փորձել են ազատվել հենց այս գործը դեմ տալով՝ պատճառաբանելով, թե սեղմ ժամկետում ծանր հանցագործությունն այդպես էլ չեն կարողացել բացահայտել :
Քրեական գործը հարուցված է, իսկ հանցագործությունը շարունակում է չբացահայտված մնալ:Hraparak.am-ին հաջողվեց կապ հաստատել եւ զրուցել տուժողի՝ Վարդան Առաքելյանի հետ: Նա ծանր վիրահատությունից հետո գտնվում է կազդուրման փուլում: Փոքր-ինչ դժկամությամբ համաձայնեց մեր մի քանի հարցերին պատասխանել՝ ասելով, թե պատկերացում չունի՝ ո՞վ է ոճրագործության հեղինակը: «Ես ոչ մի թշնամի չունեմ, ինչ-որ մեկի հետ էլ էդպես լուրջ խնդիր չունեմ: Ինձ թվաց շունս Է ու հենց պտտվեցի , էլ բան չեմ հիշում, կրակոցներ էլ չեմ լսել»,-ասաց նա: Մեր հարցին, թե խոսակցությունների համաձայն Ծաղկաձորի ոստիկանապետին աշխատանքից ազատել են գործը չբացահայտելու համար, պատասխանեց. «Հանցագործին դեռևս չեն գտել, բայց որ ոստիկանապետը դրա համար է ազատվել, ոչինչ չեմ կարող ասել, ես անձամբ ոստիկանապետի հետ չեմ խոսել ու հաստատ ոչինչ չեմ կարող ասել»: Մանրամասները՝ այստեղ։
Մանրամասները Տեսանյութում
