Երևանի քաղաքապետարանի մոտ այսօր բողոքի ակցիա կազմակերպած քաղաքացիներից երեքին ոստիկանները բերման ենթարկեցին։ Նրանք, հիշեցնենք, աղբ էին բերել և լցրել Երևանի քաղաքապետարանի մուտքի մոտ՝ ի նշան բողոքի, որ քաղաքում աղբահանությունը պատշաճ չի իրականացվում։ Ոստիկանության աշխատակիցների պնդմամբ՝ բերման ենթարկելը պայմանավորված էր քաղաքացիների կողմից ոստիկանության օրինական պահանջներին չենթարկվելու հանգամանքով։ Իսկ ոստիկանության աշխատակիցը պահանջում էր, որպեսզի ակցիայի մասնակիցները հավաքեն այն աղբը, որը բերել և լցրել էին քաղաքապետարանի շենքի մուտքի մոտ։
Բերման ենթարկված քաղաքացիներն են Սարգիս Տեր-Եսայանը, Սամվել Մովսիսյանը և Վահե Դիլոյանը։ Տեսանյութում երևում է նաև, որ ոստիկանության աշխատակիցը հրում է ակցիայի մասնակից մեկ այլ քաղաքացու։ Ավելի ուշ ակցիային ֆեյսբուքյան գրառմամբ անդրադարձել է Երևանի քաղաքապետի խոսնակ Հակոբ Կարապետյանը՝ տեղեկացնելով, որ աղբահանության հարցը մայրաքաղաքում շուտով կլուծվի: «Երևանի ավագանու «Երկիր ծիրանի» խմբակցության նախկին (2017-ի գումարման) անդամ Սոնա Աղեկյանը մի քանի հոգու հետ միասին «բուրավետ» պերֆորմանս է արել քաղաքապետարանի դիմաց՝ կենտրոնական մուտքի մոտ լցնելով ինչ-որ տեղից բերված աղբը։
Չգիտեմ, թե որքանով են քաղաքացիները ճիշտ հասցե ընտրել իրենց բողոքի համար, քանի որ հայտնի է, որ մինչ օրս «Սանիթեք» ընկերությունն է ըստ պայմանագրի համարվում աղբահանության օպերատորը։ Աղբահանության նորաստեղծ համայնքային հիմնարկը կոչված է ապահովել քաղաքի մաքրությունը հիմնական օպերատորի անկարողության դեպքում, և հիմնարկը հիմա համալրվում է անհրաժեշտ մարդկային և տեխնիկական ռեսուրսով։ Մոտ օրերս Երևան կհասնի նոր աղբարկղերի խոշոր խմբաքանակ, իսկ մի քանի շաբաթից կժամանի աղբատար մեքենաների մի մասը, որը զգալիորեն կթեթևացնի աղբահանության հարցը։ Ընդհանուր, ինչպես հայտնի է, գնվել է 24 մեքենա, ևս 10-ի գնումը ընթացքի մեջ է։ Առկա անբավարար վիճակը ստեղծվել է տարիների ընթացքում և պատճառները բազմապիսի են։ Այնուհանդերձ, ևս մեկ անգամ հայցում ենք համաքաղաքացիների ներողամտությունը ստեղծված անհարմարության համար և խնդրում ենք զինվել համբերությամբ։ Աղբի խնդրի լուծումը շատ մոտ է»,- գրել է Հակոբ Կարապետյանը։
Մանրամասները՝ factor.am -ի տեսանյութում
