Lragir.am-ը Գրում է.
«Դա ներքին փաստաթուղթ է և ձեռնարկած գործողությունները գտնվում են ՊՆ իրավասության տիրույթում: Ընդհանրապես, գործող Սահմանադրության համաձայն, գործադիր իշխանությունն էր ապահովում պաշտպանության և անվտանգության ոլորտում քաղաքականության իրականացումը, իսկ պաշտպանության նախարարի որոշումները նախագահի կողմից հաստատում չէին պահանջում: Որքանով ինձ հայտնի է, բանակային ստորաբաժանումները 2008թ. մարտի 1-ին զենք չեն կիրառել և չեն բախվել ցուցարարներին», ասել է Ռոբերտ Քոչարյանը:
Ինչպես հայտնի է, ՀՔԾ-ն մեղադրանք է առաջադրել այն ժամանակ Պաշտպանության նախարար Միքայել Հարությունյանին, Ռոբերտ Քոչարյանին էլ ծանուցագիր է ուղարկվել հարցաքննության ներկայանալու համար: Քոչարյանի խոսնակը նույնպես հայտարարել էր, որ նա կապ չունի 0038 հրամանի հետ:
Հիշվում է՝ ապրիլյան պատերազմից հետո մի հարցազրույցում Սերժ Սարգսյանը, խոսելով զինադադարից, ասել էր, թե ինքը չգիտեր էլ՝ ինչ են Մոսկվայում պայմանավորվել Հայաստանի ու Ադրբեջանի ԶՈՒ գլխավոր շտաբների պետերը:
Քոչարյանն ու Սարգսյանն իրենք իրենց հռչակում էին որպես անփոխարինելի գործիչներ անվտանգության հարցերում: Նրանք հիմնականում դրանով էին հիմնավորում նախագահելու իրենց «իրավունքը», իսկ Սերժ Սարգսյանի պարագայում էլ՝ իշխանության երկարաձգումը կառավարման կարգի փոփոխության միջոցով: Բացի այդ, նրանց կառավարման էությունը լիակատար վերահսկողությունն էր բոլոր ոլորտներում:
Բայց երբ հարկ էր պատասխանատվություն ստանձնել որպես գերագույն գլխավոր հրամանատարներ, երկուսն էլ «ուրացան» այդ հանգամանքը: Փաստորեն, նրանք հայտարարում են, որ տեղյակ չէին, թե ինչ է անում բանակը:
Խոսքն այս դեպքում մեղավորության մասին չէ, դա իրավական ու իրավապահների տիրույթում է: Խոսքը պատասխանատվության մասին է՝ որպես երկրի ղեկավարներ: Սա Քոչարյանի ու Սերժ Սարգսյանի օրոք հաստատված իշխող համակարգի բնութագիրն է՝ այդ համակարգն իրեն էր վերցրել բոլոր իրավունքները՝ իրենից գցելով պատասխանատվությունը: Դա արտահայտվում էր թե ներքին, թե հատկապես արտաքին քաղաքականության մեջ, երբ երկրի բոլոր իրավունքները հանձնվեցին արտաքին «հովանավորին»՝ ներսում ամենաթողության ու անպատասխանատվության «իրավունքի» դիմաց:
Այդ պատճառով, երբ երկրում տեղի էին ունենում խոշոր ցնցումներ, սկանդալներ ու աղետներ, մեղավորներ ու պատասխանատուներ չկային: Դա մորթապաշտ, հակապետական համակարգերի բնորոշ գիծն է:
