Ինձ համար ոչ մի նշանակություն չունի կուսակցական պատկանելիությունը, եթե հիշում եք, ինձ ընտրել է նաև ընդդիմությունը, եթե ես կաշկանդված լինեի, այս ընթացքում գիշեր-ցերեկ կաշխատեի՞:Ինչպես մանրամասնում է tert.am-ը Այս մասին Ազգային ժողովում լրագրողների հետ զրույցում ասաց Մարդու իրավունքների պաշտպան Արման Թաթոյանը: Նրա խոսքով՝ հարթակի առաջնորդները ևս ՄԻՊ գրասենյակին իր աշխատանքի համար շնորհակալություն են հայտնել:
«Օր ենք ունեցել, որ ազատությունից զրկված անձի խնդրանքով մենք իրեն շարասյան հետ ուղեկցել ենք քրեակատարողական հիմնարկ, որովհետև մտավախություն ենք ունեցել, որ հանկարծ կարող է վատ վերաբերմունք լինել: Մերոնք բառի բուն իմաստով հերթապահում էին ոստիկանության բաժիններում:
Շարժման առաջնորդներն ինձ հետ պարբերաբար կապի մեջ էին, անընդհատ իրենք էլ էին տեղեկություններ փոխանցում: Ես ուզում եմ նաև հատուկ նշել, որ գլխավոր դատախազը մեր պայմանավորվածությունից հետո հանձնարարել էր ամեն բաժնում մեկական դատախազ պահել, մենք ուշադրություն էինք դարձնում նաև փաստաբանների մուտքին»,-շեշտեց նա:
Արման Թաթոյանն ընդգծեց, որ իր կարգավիճակը թույլ չի տալիս գնահատականներ տալ Էրեբունի փողոցից Նիկոլ Փաշինյանի հեռացմանը, այն անվանելով առևանգում, ինչպես լրագրողներ են նշում, բայց Սասուն Միքայելյանի նկատմամբ, ըստ նրա՝բռնություն է կիրառվել:
Արման Թաթոյանը նորմալ չի համարում նաև այն, որ խաղաղ ցույցի ժամանակ ոստիկանները գործողություն են իրականացրել դիմակավորված:
