«Զվարթնոց» օդանավակայանից ռուս սահմանապահներին դուրս բերելու մասին որոշում Հայաստանը չի կայացրել, Ռուսաստանին այդ մասին չեն հայտնել։ Այս մասին ասել է ՌԴ նախագահի մամուլի քարտուղար Դմիտրի Պեսկովը Սոչիում ընթացող Համաշխարհային երիտասարդական փառատոնի ժամանակ։
«Այդ առումով ինչ-որ որոշումներ, որքան մենք հասկանում ենք, չեն եղել: Պաշտոնական ուղիներով ոչ ոք մեզ չի հասցրել այդ որոշումները»,- ասել է Պեսկովը։
Ինչ վերաբերում է հայ-ռուսական հարաբերություններին, նա նշել է, որ Մոսկվան ունի քաղաքական կամք դրանց հետագա կառուցման համար, իսկ ներկայիս դժվարությունները կանցնեն։
Ռուսաստանը բարձր է գնահատում Հայաստանի հետ հարաբերությունների առանձնահատուկ բնույթը: «Երկրների հարաբերություններում, ինչպես մարդկանց հարաբերություններում, տարբեր փուլեր են լինում: Ամենամոտ հարևանները կարող են ունենալ մի շրջան, երբ հարաբերությունները սրվում են: Բայց այստեղ պահանջվում է քաղաքական կամք, մեր կողմից դա կա»,- ասել է մամուլի քարտուղարը։
