Ռազմական դրություն, էթնիկ զտումներ․ Պուտինի հրամանագիրը ՌԴ հայերին դնում է ծանր վիճակում

Lragir.am-ը գրում է. Ուկրաինայի բռնակցված 4 շրջաններում Պուտինի կողմից ռազմական դրություն հայտարարելը ուղեկցվել է «կողմնակի» հրամանագրերով, որոնք կարող են անմիջական առնչություն ունենալ հայերի և ՌԴ այլ ազգային փոքրամասնությունների վրա։

Պուտինն ասել է, որ Կրասնոդարի երկրամասում, Բելգորոդի, Բրյանսկի, Վորոնեժի, Կուրսկի և Ռոստովի մարզերում, ինչպես նաև բռնակցված Ղրիմում և Սևաստոպոլում սահմանվել է արձագանքման միջին մակարդակ, իսկ հարավային և կենտրոնական դաշնային այլ շրջաններում՝ բարձր մակարդակ։

Պուտինի հրամանագրով սահմանվում է, որ տեղաշարժի ազատությունը կարող է սահմանափակվել, մեքենաները կարող են խուզարկվել, տրանսպորտը, կապը, կապի միջոցները, ինչպես նաև տպարանները կարող են օգտագործվել պաշտպանական կարիքների համար, բնակիչները կարող են ժամանակավորապես տեղափոխվել այլ տարածքներ: Բացի այդ, կարող է հարկադիր մոբիլիզացիա լինել և բանակում, և թիկունքում աշխատելու համար։

Հարավային դաշնային շրջանը հայերի և այլ էթնիկ խմբերի կոմպակտ բնակության վայր է։ Այս էթնիկ խմբերն այստեղ ապրում են սերունդներ շարունակ, ոմանք վերջին տարիներին են տեղափոխվել՝ գայթակղվելով պուտինյան «կայունությամբ» ու հեշտացված անձնագրով, կարողացել են զգալի ունեցվածք կուտակել, ու հիմա ամեն ինչ վտանգի տակ է։

Պուտինի երկրորդ որոշումը միգրացիոն քաղաքականության վերանայումն է. Պուտինը նշել է, որ միգրացիոն խնդիրը «չափազանց զգայուն է Ռուսաստանի ազգային անվտանգության և կայուն զարգացման համար»։

Այս տարվա փետրվարից Կրեմլը «հատուկ գործողության» շրջանակներում փորձում է լուծել  «ազգային հարցը», մասնավորապես հնարավոր սեպարատիստական շրջաններում։ Էթնիկ փոքրամասնությունները, այդ թվում՝ հայերը, անհամաչափորեն ընկնում են մոբիլիզացիայի տակ։ Այժմ նրանց կոմպակտ բնակության վայրերը գտնվում են փաստացի ռազմական դրության գոտում։ Կրեմլն այսպիսով ցանկանում է մի կրակոցով մի քանի հարց լուծել՝ գրավել նոր հողեր և «ոչ ռուսներին» նետել պատերազմի կրակի մեջ, ինչպես նաեւ երկրի դժբախտությունների համար մեղքի սլաքներն ուղղել նրանց դեմ, հատկապես հայերի եւ ուկրաինացիների վրա։ Ղրիմի կամրջի պայթյունի գործը դրա վկայությունն է։

Կարդացեք նաեւ Ռուսաստանը իսլամական բանակ է ձեւավորում Թուրքիայի դրոշի ներքո․ Հառաջ, «ադրբեջանցիներ»

Հավանեցի՞ք նյութը, կիսվեք մտերիմների հետ.