Քաղաքացիական պայմանագիր խմբակցությունը դեմ է քվեարկել «Հայաստան» խմբակցության նախաձեռնած «Սահմանազատման և սահմանագծման խնդիրների մասին» հայտարարության նախագիծը խորհրդարանի օրակարգ ընդգրկելուն։
«Հայաստան» խմբակցության ղեկավար Սեյրան Օհանյանն ասել է, որ այս հարցի շուրջ լսումները կարող են նպաստել Հայաստանի և Արցախի համար կարմիր գծերի սահմանմանը։ Օհանյանի խոսքով՝ հապճեպ քայլերը կվնասեն Հայաստանի տարածքային ամբողջականությանը և Արցախի ինքնիշխանությանը, ինչպես նաև նրա ապագային:
«Քաղաքացիական պայմանագիր» խմբակցության պատգամավոր Հռիփսիմե Գրիգորյանը նշել է, որ կառավարության սահմանազատման օրակարգը միտված է այս հարցը Ղարաբաղի խնդրից տարանջատելուն։ «Դելիմիտացիան վերաբերում է Հայաստանի և Ադրբեջանի սահմաններին, Ղարաբաղի խնդիրը ոչ թե տարածքների, այլ ժողովուրդների ինքնորոշման խնդիր է։ Նախագծի հեղինակների՝ այս երկու խնդիրները կապելու փորձը չի բխում Հայաստանի Հանրապետության շահերից, ուստի անընդունելի է»,- ասել է նա։
Նիկոլ Փաշինյանն ասում է, որ սահմանազատումը կապված չէ Ղարաբաղի խնդրի հետ: ՌԴ ԱԳ նախարար Սերգեյ Լավրովը նույնպես ասել է, որ Մոսկվան կողմ է Հայաստանի և Ադրբեջանի միջև հնարավորինս շուտ սահմանազատմանը։ «Սակայն դա չի վերաբերում Ղարաբաղի տարածաշրջանին, սա զուտ երկկողմանի խնդիր է, որի վրա մենք առաջարկում ենք սկսել աշխատել արդեն մոտ մեկ տարի՝ դրա համար սահմանազատման և սահմանագծման հանձնաժողով ստեղծելով։
Լավրովն ասել է. «Հենց երեկ ես կապ հաստատեցի հայ գործընկերոջ հետ, ով նոր առաջարկներ ունի։ Մենք դրանք կփոխանցենք Բաքվին։ Տարաձայնություններ կան, բայց մեր դիրքորոշումը հստակ է՝ մենք պետք է նստենք և հանձնաժողովի շրջանակներում լուծենք չլուծված հարցերը», ասել է Լավրովը։
Ահա թե ինչ նկատի ունի Լավրովը չլուծված հարցեր ասելով։ Ղարաբաղի խնդիրը Մոսկվան համարում է լուծված։ Այս ֆոնին, ի՞նչ առաջարկների մասին է խոսքը։
Հայաստանի «կարմիր գծերն» իսկապես հստակեցված չեն, և դա տեղ է թողնում նոր կորուստների համար։ Հայաստանի իշխանության պահվածքը, որը Մինսկի խմբի ձևաչափից դուրս որևէ բանակցություններից հրաժարվելու փոխարեն նոր առաջարկներ է առաջ քաշում, Մոսկվային և Բաքվին թույլ է տալիս տորպեդահարել ԵԱՀԿ-ի աշխատանքը և կարգավիճակի քննարկումը։
Հավանեցի՞ք նյութը, կիսվեք մտերիմների հետ.
Նյութի աղբյուր՝ www.lragir.am
