Shamshyan.com-ը գրում է.Այսօր՝ հունվարի 3-ին, լարված իրավիճակ է ստեղծվել Շիրակի մարզում: Մարալիկի առողջության կենտրոնում տեղակայված Մարալիկի ծննդատան 100-ից ավելի աշխատակիցներ, ինչպես նաև նրանց միացած մեծ թվով ծննդկաններ ու մի քանի գյուղերի բնակիչներ պահանջում էին, որպեսզի վարչապետ Նիկոլ Փաշինյանը արձագանքի իրենց խնդրանքին:SHAMSHYAN.com-ի թղթակցի հետ զրույցում նրանք ասում էին. «Այսօր առավոտյան ծննդատան տնօրեն Վռամ Մելիքյանը մեզ ամանորյա նվեր մատուցեց՝ ասելով, թե կառավարությունը որոշել է, որ ծննդատունը պետք է փակվի ու այսուհետ ծննդկանները պետք է օգտվեն Գյումրիի բժշկական կենտրոնի ծննդատնից:
Նման անհեթեթ անակնկալ մենք չէինք սպասում: Էս ծննդատունը դեռ սովետական տարիներից է գործել ու ամեն տարի 100-150 ծնունդ է ընդունում: Ծննդատունը սպասարկում է 17 գյուղ և կան գյուղեր, որտեղից Գյումրի գնալու համար պետք է կտրեն ու անցնեն 20-40 կիլոմետր: Հետաքրքիր է, մեր տնօրենը, ում նկատմամբ քննիչները գործ են հարուցել 8 մլն դրամ յուրացնելու համար, հայտնել է իրավասու մարմիններին, որ այս ծննդատունը մի քանի սերունդների կյանք է պարգևել:
Մենք վստահ ենք, որ եթե վարչապետ Ն. Փաշինյանին ճիշտ տեղեկություններ տան ու հայտնեն, որ այս գյուղերի համար, մանավանդ՝ ձմռան ամիսներին, դժվար է ճանապարհների մերկասառույցների պատճառով ծննդկաններին հասցնել Գյումրի ու լուծարելու արդյունքում մարդիկ գործազուրկ են լինելու, հաստատ ավելի խելամիտ լուծում կգտնի: Թե չէ Շիրակի մարզը մի մաքսակետով առաջ չի գնա: Այս պահին էլ ծննդատանը մի քանի ծննդկան կա, ովքեր սպասում են իրենց բալիկների լույս աշխարհ գալուն:Կրկին խնդրում ենք վարչապետին, որ միջամտի այս հարցին»:
Գյուղերի բնակիչները նաև ասում էին. «Մենք բազմաթիվ սոցիալական խնդիրներ ունենք: Մեր բնակչության մեծամասնությունը սոցիալապես անապահով է ու ծննդատունը Գյումրի տեղափոխելը լրացուցիչ հարված է լինելու մեր գրպանին:
Ստիպված ենք լինելու կրկնապատիկ, եռապատիկ գումարով հասնել Գյումրի, բավական երկար ժամանակ ծախսել, գնալ, հերթերի մեջ կորել, մինչդեռ Մարալիկի ծննդատանը նման խնդիրների երբեք չենք բախվել: Ավելին, ունենք մայրեր, որոնք իրենց բալիկներին այստեղ լույս աշխարհ են բերել գիշերը 2-ին, 3-ին, կապ չունի, որ ժամին, այստեղ բժիշկները միշտ սրտացավ են ու պատրաստ են օրվա ցանկացած ժամի մեր կանանց կողքին լինել»:
SHAMSHYAN.com-ի թղթակիցը հայտնում է նաև, որ ծննդատանը լուծված է կադրերի խնդիրը, երբևէ ծննդատանը նորածինների ու ծննդկանների մահացության դեպքեր չեն գրանցվել: Ծննդատունը հագեցած է գերժամանակակից, միջազգային բոլոր չափանիշներին համապատասխանող բուժսարքավորումներով՝ շնորհիվ իտալացի բարերարի: Մանրամասները այստեղ:
Լուսանկարները՝ SHAMSHYAN.com-ի
