Երեկ՝ հոկտեմբերի 18-ին, խոշոր հրդեհ է տեղի ունեցել Գեղարքունիքի մարզում։ Ժամը 11։00-ի սահմաններում Արտակարգ իրավիճակների նախարարության Փրկարար ծառայության Գեղարքունիքի մարզային փրկարարական վարչություն ահազանգ է ստացվել, որ հրդեհ է բռնկվել Գեղհովիտ գյուղի 1-ին փողոցի 128 տան հարևանությամբ գտնվող փայտամշակման և կահույքի արտադրամասում։ Ինչպես հայտնում է ֆոտոլրագրող Գագիկ Շամշյանը, հրդեհի
վայր են ժամանել Մարտունու հրշեջ-փրկարարական ջոկատը, ովքեր գյուղացիների հետ մի քանի ժամ պայքարել են կրակի տարածման ու մարման դեմ։ Գ. Շամշյանի տեղեկություններով՝ հրդեհի դեմ պայքարում առաջացած «հրդեհի ծխից թունավորում՝ շմոլ գազով» ախտորոշմամբ ժամը 14։30-ի սահմաններում «Մարտունի» բժշկական կենտրոն են տեղափոխվել նույն գյուղի բնակիչներ՝ 32-ամյա Արմեն Մադաթյանը, 33-ամյա Կարեն Մադաթյանը, 15-ամյա Կարեն Գրեյանը, 15-ամյա Հարություն Սաֆարյանը։ Վերջիններս մինչև հիվանդանոց տեղափոխվելը
բժշկական օգնություն են ստացել հրդեհի հարևանությամբ բնակվող բնակիչների կողմից։ Գ. Շամշյանի տեղեկություններով՝ ամբողջովին վառվել է 45-ամյա Աշոտ Սարգսյանին պատկանող
փայտամշակման և կահույքի արտադրամասը։ Վերջինս աշխատում է «Աշոտ Սարգսյան» ԱՁ-ում՝ որպես տնօրեն։ Փաստի առթիվ Ոստիկանության Մարտունու բաժնում հետաքննություն է սկսվել, իսկ Գեղարքունիքի մարզային փրկարարական վարչությունում նշանակվել են փորձաքննություններ։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Հավանեցի՞ք նյութը, կիսվեք մտերիմների հետ.
Նյութի աղբյուր՝ shamshyan.com
