ՌԴ Բելգորոդի մարզի նահանգապետ Վյաչեսլավ Գլադկովը հաստատել է, որ շրջաններից մեկում զինամթերքի պահեստ է պայթել։ Նրա խոսքով՝ պայթյունները սկսվել են Ուկրաինայի զինված ուժերի գնդակոծությունից հետո։
Ավելի վաղ սոցիալական ցանցերում հայտնվել էին հրդեհի ու պայթյունների տեսանյութեր, մինչդեռ հաղորդվում էր, որ Օկտյաբրսկի գյուղում հրդեհվել է շաքարի գործարանի շենքը, գրում է BBC-ն։
«Բելգորոդի շրջանի գյուղում Ուկրաինայի զինված ուժերի գնդակոծության արդյունքում պայթել է զինամթերքի պահեստ»,- գրել է Գլադկովը Telegram-ի իր ալիքում։ «Նախնական տվյալներով՝ զոհեր կամ վիրավորներ չկան, մենք հիմա բնակիչներին տեղափոխում ենք անվտանգ տեղեր»։
Ուկրաինան երբեք չի հաստատել, որ հարվածներ է հասցնում Ռուսաստանի թիրախներին։ Այնուամենայնիվ, ռուսական տարբեր օբյեկտներում պայթյունների և հրդեհների մասին բազմաթիվ հաղորդումներից հետո Կիևի պաշտոնյաները խորհուրդ են տվել «չծխել չարտոնված վայրերում» և «չխախտել հրդեհային անվտանգության կանոնները»:
