Զինված ուժերի գլխավոր շտաբի նախկին պետ Մովսես Հակոբյանի համար գերեվարված 62 զինծառայողները ոչնչություններ են։
Այս մասին գեներալ-գնդապետ Հակոբյանը ասաց Oragir.news-ի հարցին ի պատասխան, թե ի՞նչ հանգամանքներում ադրբեջանցի 4 զինվորները կարող էին գերեվարել 62 հայ զինվորներին, որոնք զինված են եղել․ «Դժվար է այդ հարցին պատասխանել, բոլոր դեպքերում, ինչ էլ ուզում է լինի՝ այդ 62 հոգին ինձ համար ոչնչություն են, որ հանձնվել են 4 հոգու»,-ասաց Հակոբյանը։
Հիշեցնենք, ավելի վաղ փաստաբան Վահան Հովհաննիսյանը այսօր ֆեյսբուքյան իր էջում հրապարակել էր գերությունից վերադարձած շուրջ մեկ տասնյակից ավելի անձանց ցուցմունքները․ «Երեկ հրապարակում էի կատարել այն մասին, որ Շիրակի մարզի 62 զինվորներ՝ ամբողջությամբ սպառազինված վիճակում, առանց որևէ փամփուշտ կրակելու կամովին գերի են հանձնվել 4-ից 7 ադրբեջանցի զինվորականների։ Հիշյալ հրապարակումից հետո ինձ զանգահարել կամ գրել են բազմաթիվ անձինք՝ կասկած հայտնելով գրառման իսկության վերաբերյալ։ Ի փարատումն այդ կասկածների՝ ստորև ներկայացնում եմ գերությունից վերադարձած շուրջ մեկ տասնյակից ավելի անձանց ցուցմունքներ (իրականում դրանք շատ ավելին են)։ Գնահատականները Ձեզ եմ թողնում»,- գրել էր փաստաբանը:
Մովսես Հակոբյանին հարցրինք՝ փաստորեն, համամի՞տ է Ալեն Սիմոնյանի այն մտքի հետ, որ այդ զինվորները այլևս գոյություն չունեն․ «Նրանք գոյություն ունեն որպես մարդ, ուրիշ ոչ մի բան»,- պատասխանեց ԶՈՒ ԳՇ նախկին պետը։
Իսկ հարցին, թե պետությունը պե՞տք է ջանքեր գործադրի այդպիսի գերիների վերադարձի համար, Հակոբյանը պատասխանեց․ «Պարտադիր պետք է վերադարձնի և շատ խիստ դատի, բայց վերադարձնելը պարտադիր է։ Անկախ ամեն ինչից՝ քո երկրի ամենամեծ տականքն էլ քո թշնամու ձեռքում չպիտի մնա»։
