Ուկրաինայի վերաբերյալ ռուսական բանաձեւի նախագիծը, ինչպես եւ սպասվում էր, տապալվեց ՄԱԿ-ի Անվտանգության խորհրդում՝ կողմ քվեարկեցին միայն Ռուսաստանն ու Չինաստանը, գրում է BBC-ն։
Անվտանգության խորհրդի անդամ մնացած 13 երկրները պարզապես ձեռնպահ են մնացել։ Անվտանգության խորհրդի մշտական անդամները՝ ԱՄՆ-ը, Մեծ Բրիտանիան եւ Ֆրանսիան, վետո չեն դրել բանաձեւի վրա։
Բանաձևի նախագիծը կոչ էր անում դադարեցնել կրակը և խաղաղ բնակչությանը տարհանել մարտական գոտիներից, սակայն Անվտանգության խորհրդի անդամների մեծամասնությունը հրաժարվեց աջակցել դրան այն պատճառով, որ տեքստում չկար Ռուսաստանի դատապարտումը՝ որպես հումանիտար ճգնաժամի մեղավոր։
Բելառուսը, Սիրիան և Հյուսիսային Կորեան համաձայնել են դառնալ ռուսական բանաձևի նախագծի համահեղինակներ, սակայն նրանք ներկայում Անվտանգության խորհրդի անդամներ չեն։
ՄԱԿ ԱԽ-ում ԱՄՆ ներկայացուցիչը հայտարարել է, որ Ռուսաստանը հերթական անգամ փորձում է ՄԱԿ-ն օգտագործել իր նենգ խաղերի համար։
Ռուսաստանն այս բանաձեւով մի կողմից սեփական գործողություններն Ուկրաինայում «լեգիտիմացնելու» նպատակ ուներ, մյուս կողմից փորձում է վերադասավորել ուժերն Ուկրաինայում, մեծ կորուստների ու լոգիստիկ խնդիրների ֆոնին։
ՄԱԿ ԱԽ-ում ՌԴ-Չինաստան համագործակցության մեկ այլ դրսեւորում էր 2020-ի հոկտեմբերին Լեռնային Ղարաբաղում պատերազմը դադարեցնելու վերաբերյալ բանաձեւի տապալումը Պեկինի կողմից՝ Ռուսաստանի խնդրանքով։ ՌԴ-ն Հայաստանի դեմ պատերազմում այն ժամանակ դեռ չէր հասել իր ցանկացած բնագծերին՝ Բաքվի պրոքսի բանակի միջոցով։ Ուկրաինայի դեմ պատերազմում ՌԴ-ն գործում է ուղիղ, Պեկինի եւ Անկարայի ակնհայտ դրդումներով, որոնք երաշխիքներ են տվել ՌԴ հարավային եւ հեռավորարեւելյան մերկացած ուղղությունների հարցում։
